2020 Chnulleri Wars

D'Fasnacht im Johr 2020 isch e bsunderi gsi und wird no lang allne in Erinnerig bliibe.

D'Vorfasnacht in Wittnau, dr Fasnachtsgottesdienscht, bi de Fotzelschnitte und in Rhyfälde isch super gsi. Bi schönschtem Wätter hei mir dr Umzug und d'Beizefasnacht in Chaiseraugscht chönne gniesse. Bim Umzug in Rhyfälde und au dr Chinderfasnacht am Zischtig isch es scho nümm so schön gsi und am Zischtig Zobä in Mältigä hets euse Uftritt richtig verseicht. Mit em Fasnachtsfüür am Mittwuch het denn eusi Fasnacht es abrupts Ändi gfunde.

Am druffolgende Friitig het dr Bundesrot beschlosse, das me wägenem neu ufträttene Coronavirus keini Aläss mit mehr als 1000 Persone dörf durefüehre. Dodemit isch euses Wucheändi mit plante Umzüg in Windisch und Sissach usgfalle :(
Spontan si mir am Samschtig in verschiedeni Beize und Zobä nach Obermumpf an Cherusball (als Ersatz für e usgfalleni Gugge) und am Sunntig Zobä an d'Beizefasnacht nach Prattälä, wo het dörfe stattfindä.