Geschichte

Vor eusere Guggä isch d`Fasnacht no so gsi in Chaiseraugscht:

"Am Anfang war die Musik", so fangt unseri Entstehigsgschicht a. Chaiseraugscht het dennzumol am Sunntig Fasnacht gha, mit aschliessender Beizeduur im Löie, Bahnhöfli, Sunne und Adler. Dr Fasnachtsumzug isch nur vo dr Musiggsellschaft und es paar Wäge wie: Doleputzer, Barrieregloggeruesser (spöteri Gullewagerrugger), Souchöpf, Trottebuebe und de Rambasse bsetzt gsi. D`Chaiseraugschter Musig isch aber au no z'Prattäle verträtte gsi. Einigi vo dene Musiker sind sich aber dört "dr näbe" vor cho, will dozumol in Prattäle scho ä huffä Guggä gschpielt hei. Das het natürlich zumene Konflikt in der Musiggsellschaft Chaiseraugscht gfüert und zwar über d'gschtalltig vo dr Musig a dr Fasnacht (um 1970).

"Dann kam die Wende!"

Apollokapsel Fasnacht 1969

Wo denn a dr Fasnacht 1972, am Prattlerumzug d`Musig in dr, vom Teruggia Felix entworfene Apollokapsel ummegfahre isch, und sie vom Komitée erfahre hei, dass, wenn sie statt schöni Musig, Guggämusig g'schpielt hätte, sie vill grösser usecho wäred, hets be äs paarnä dr Deckel glüpft. Voller entschlosseheit het me gseit, dass me jetzt ä Guggä gründe duet.









Einigi Afangsschwirigkeite

Stereobass Fasnacht 1977

D'Musig isch aber dr gäge gsi und het äne verbotte ä Teil vo de Inschtrument vo dr Musig für d`Guggä zbenütze. Dodruf abä het dr Hollenstein Toni halt sälber Instrumente baut. Das alles het zunere Trotzreaktoin gfüert und me het jetzt erschträcht wellä die Gründig durästiere. D`Musik het denn nümm ds Prattäle mitgmacht.
Am Banntag hei eusi "Vorfahrä" sogar ihres chlinä Marschbiechli verbrennt, wo sie z`Prattäle drus gschpielt hei.

 

Die erschte Vorkehrige si gmacht worde...

S`erschtä Koschtüm het d'Frau Rivar für sie gschniederet (d`Hosä si uns Matratzestoff gsi und si bim erschte wäschä böös iigange). Schpöter hets s`Afra Schmid gmacht. Hütt mached's d'Gerda und s'Evi. D`Larve het ä Herr Roger Mayn, wo Larväkünschtler isch, gmacht und d`Millionenote isch vom Teruggia Felix kreirt worde . Me het sich im Komitée gmäldet.

Jetzt het me afo üebä

D`Stückli het dr Grossenbacher Hans (er het es Joor vorher z'Basel usghullfä) vorgschpilt und alli hei, mit em Hollenstein Toni, in de Probe d`Stückli zämmegschtellt. Probe hei bem Oechslin Roger in dr "Budä" statt gfundä, und ich glaub, me het dört nit nur schpiele güebt.

Euse Name het ä bsunderi Gschicht

Jetzt fehlt nur no dr Name. Mä muess wüsse, dass Chaiseraugscht dozumol äs Buuredorf gsi isch und de Name Chnulleri isch ä alte Usdruck für: Hinterwäldler, verchnortzt, ängstirnig, Brätt vorem Chopf...
Also Dorfchnulleri. Die hei Geld becho dur d`Induschtrie und wo d`Liebrüti baut worde isch, hets ä Bauboom geh. Churz gseit: Dr Dorfchnulleri wird zum Grossschtadtchnulleri! Die Millionnote mit dr Mischtgable uf dr Larve, zeigt das plötzlichä riichwärde vo de Chnulleris.

Die erschte Uftritt und die erschte Erfolge

D`Guggä het bis 1974 nur in Prattäle und Chaiseraugscht g`spielt und isch denn s`erschti mol usswärts gsi und zwar in Laufä, wo sie bim erschte mol 300-400.- Schpändägeld becho hei. Schpöter hei sie anäre Schwiitzer- Meischterschaft in Zürich (organisiert vom Schmid Fritz) teil gno und sind zweitletschti worde (Mir si stolz uf euch!!).
Am Chaiseraugschter Grümpeli hei sie natürlich nit gfehlt. Voll verchleidet und mit em Guggämarsch si sie ufs Fuessballfäld gangä.

Gründigsmitglieder si gsi:

Hugo Schmid, Roger Oechslin, Fritz Schmid, Felix Schmid, Hans Grossenbacher, Kari Künzli, Joachim Schmid, Trix John-Meyer, Anton Hollenstein Dirigent), Myrta Baur-Grossenbacher, Rosmarie Meienberg- Künzli, Peter Benz, Felix Teruggia.

2002 Fabienne Grossenbacher