2004 Cyborg

 

Gruppenfoto

D'schuld a dem Sujet isch dr Guido gsi. Er isch denn au grad i d `Koschtümkommission idrätte. Zäme mit zwei wiitere Jungs. Dass trotzdem e sone schöns Kostüm entstot, hän mir numme chönne hoffe. Me merkt aber scho, dass es nur vo Manne entworfe worde isch. Trotz allem: hän dr Super gmacht!!!

Mit em Dorf het das Sujet aber nit viel z due. Aber das bizeli wo mer hei chönne usefinde, schtot in eusem disjöhrige Fasnachtszettel. Viel spass!!

 

E Cyborg isch halb Maschine und halb Mensch,
ha scho dänkt, dass de das nit kennsch.
So öppis ähnlichs gits bi uns im Dorf au,
gwüssi Lüüt sin au nur halbe schlau.

Uf dr Überholspur chansch am Junkholz verbii bloche,
I frog mi, wär het ächt das verbroche?
Mir Cyborgs finde, schlimm isch’s nit,
die neui Ruumschiffpischte isch de Hit.

A propos bloche, chunnt mir do in Sinn,
dr Blocher isch jetzt doch im Spacerot drin.
Mir wei luege wie lang as es goht,
bis s’Bundeshuus plötzlich z’Züri stoht!

Di tüüre Schtüüre, s’tüen alli pfuttere,
die ( no ) läbige wänd nid meh buttere.
S’Schtüüramt tuet drum kei bitz schwarz moole,
me goht s’Gäld eifach uf e Friedhof go hole.

Die letscht grüen Wiese im Dorf isch gsii,
dört chömme bald Ruumstatione hi.
Rägetonne stönd jetzt no überall,
Kari, schicksch die mit ins All?

Uf dr Enterprise hetts au kei Pflanze gha,
Für was müend mir also Grüenmulde ha?
Biimed das Grüenzüügs doch uf e Mond,
Für d’Gmeind sich das wohl besser lohnt.

Immer weniger Clique sin an dr Fasnacht z’gseh,
uns Fastnächtler tuet das ziemlich weh!
Dä Umzug het nur no knapp ei Waage,
dr nöchscht chansch us em Cyberspace laade.

Raffed euch uf, gib dir e Ruck,
sunscht stirbt eusi Fasnacht Stuck für Stuck!
Scho mit wenig Ufwand chansch ab uf d’Gass,
Maske, Waage, Bank - s’macht alles Spass!

Dr Chnulleri

2004, Fabienne & Urban