2003 Neandertaler

 

Gruppenfoto

E Luune vo dr Natur isch es gsii, das d'Chnulleri im Johr 2003 als Neandertaler s'Dorf unsicher mache. Aber nach genauerem aaneluege sin denn doch no rächt vieli gemeinsamkeite zwüsche de Chaiseraugschter und de Neandertaler vürechoo.

 

In Chaiseraugscht, jetz ohni z’hüüle,
schafft me no mängisch mit de Küüle.
Mir hän für sie mol recherchiert,
wär so als Neandertaler durch’s Dorf marschiert.

Bi de Muusig hän mir aafo sueche,
will die ihri Dirigänte tüen verflueche.
Wenn dä vo sälber halt nid will go,
muess me ihn halt mit de Küüle schloo.

Dr neui Kreisel, dä isch e Hit!
Nur, d’Neander-Fahrer mache do nit mit.
D’Strooselampe schtöhn z’nöch und d’Ifahrt isch z’äng
Es stört nid lang, scho glii macht’s „PÄNG“
D’Wiese het e Spur und d’Lampe isch knickt,
Die hän wohrschiints eine mit ere Küüle gschickt.

Mängs Schööfli het viel Schmerz müesse fühle,
Drum git me im Hirt eins mit de Küüle!
Viel z’lang het är Lüüt us dr Chille g’eklet,
E mäng ein fühlt sich do versecklet.
Si Huus wird umbaut und renoviert,
Alles hofft, dass en bessere aamarschiert.

Hinter dr Liebrüti het’s neui Höhlene geh,
me tuet gärn dr Fuessmarsch uf sich neh.
D’Völkerwanderig isch wieder modärn,
Doch s’Ziel liegt diesmol gar nid färn.
Die alt Höhli isch freigeh zum entsorge,
do mues me nid emol me ä Küüle bsorge.

Mängisch tuet me zerscht mit de Küüle schloo,
bevor me weiss, wie’s söll wiiter goh.
Uf de Gmeind sind si mit de Küüle tüchtig,
me chönnt sogar meine, die siige süchtig.
Uf 104 Prozänt händ sie welle uufeschloo,
doch d’Retourküüle hän si prompt becho.

Wiiter goht’s in däm Schtil, es isch nid glooge,
de Leue isch gschtampft in Grund und Boode.
D’Iiszit isch cho, s’isch chalt in dr Höhli,
zum Chinder „bschtelle“ fehlt eim d’Wöhli.
Drum git’s in Chaiseraugscht halt kei Schuelhuus „Leue“,
D’Chind chönnd sich defür am Schpielplatz freue.

So, jetzt bin i ’s ändlich los,
I hoff, dr Ärger wird nit allzue gross.
Ha gschriibe was mi macht verruckt,
und s’Johr dur mini Küüle juckt.
Ich wünsch allne e grosses Fastnachtsfescht,
Für schlächti Närve isch das s’Bescht!

Dr Chnulleri

2003, Fabienne & Urban