2002 30 Johr Chnulleri

 

 

 

Scho sit 30 Joor gits öis Gugger,
trotzdäm simmer no im Saft mir Rugger.

Jede Mittwuch am achti düemer probe,
öise Chef dr Guido, duet is nit nume lobe.

Mängisch müemer sogar mit Musignote lehre,
s`isch als wett me is zu Philharmoniker bekehre

Am zähni isch die Prob denn ame verbi,
aber kei Angscht, das isch es nonig gsi.

Vom lute rugge duet is d`Schnure weh,
s`isch höchschti Zit, dass mer eine chönne go neh.

D`Muusigkommission duet neui Schtückli bringe,
wenn’s guet chunnt, düent sie se öis vorsinge.

Die meischte aber chömmer ab dr CD loose,
druff versueche mer, die Melodie z`bloose.

Am Afang tönts wie Chrut und Rüebe,
mir wärde vergwaltigt au deheime z`üebe.

Chame einigermasse d`Melodie erkenne,
muess dr Schlag drzue no Farb bekenne.

Die trümmele drzue, die erschte Schleger sind gschlisse,
vor luter Wöhli hets au s`Fähli no verrisse.

Chunnt erscht d`Pauke no drzue,
isch es definitiv fertig mit dr Rueh.

Zämme foht`s fätzig afo tööne,
mir sind Fans, tüend öisem Hobby fröhne.

Bald scho chunnt die schträngi Fasnachtsziit,
mir gäbe Vollgas, mängisch goht`s fascht z`wiit.

Mit Pauke und Trumpete laufe mer in d`Halle i,
jetzt gilt`s ärnscht, mir si „voll“ drbi.

D`Lüt sölle klatsche, kreische und umegumpe,
wär nit mitmacht isch e schlappe Lumpe.

Darfsch dr Umzug am Sunntig nit verpasse,
nur Weicheier und Langwiiler sind denn am jasse.

Mach doch au mit, s`isch nit sälbschtverschtändlich,
schminke und verchleide, klemm di in Arsch ändlich

S`Finale und dr Cheruus darfsch nit vergässe,
bisch e halbi Hose, chunnsch halt nume öppis cho ässe.

D`Chinderfasnacht isch für jedes Mami e Pflicht,
e riese Party, s`isch vill Nochwuchs in Sicht.

Am Fasnachtsfüür isch es scho fascht wieder gloffe,
alli gönd hei, e paar nüechter, die meischte bsoffe.

Dr Pratteler Umzug git is denn no dr Räscht,
no e Mählsüppli, und ab – für e Wuche – ins Näscht.

2002 Schätti